Baewlu ‑ɛ ‑pooa 'de 'beɔ 'ɔ ‑tɩ' 'ʋn ɛ
20
Dafi 'a dʋ ‑ɛ ‑crɩaa' 'de 'dʋ ‑jeopoi klaa" 'a 'dʋsbɛ 'di ɛ.
2 ‑Bo ‑ɩn ‑nɩ 'e 'kle 'di Nɔsoa kpʋn ‑ma baewlu‑.
Tʋ "bo ‑ɛ ‑nɩa Sakɔbʋ 'a Kea ɛ ‑criɛ" ‑ʋn kwa "kpei.
3 Ɛ 'wlʋ 'e ɛɛ' ‑gbu" klaa" 'di ɛ 'je ‑ʋn sʋn opo, ɛ nɩ 'de Selisalɛmʋ
‑teea kpɔi" ‑wɛe ɛ 'je ‑ʋn kwa wɛi ‑te'.
4 ‑Paan' ‑ma nʋɛ "jrii ɛ, ɛ 'bo ɩa' due' koun ‑gbai' ka o "maeɛ,
‑wɛe ɛ 'je ‑ma 'sraadɩ kpʋn. ‑Te' ‑kwlʋ.
5 Dɩ ‑ma pɛe nɩa "i ɛ, ɛ "nyɩ ‑ʋn,
dɩ "klein ‑ɩa 'plɩ ‑ɩn ‑tea', ɩ nʋʋɛ‑.
6 ‑Ɩn kpa tʋ 'a "jru 'bo ‑ma tʋnyʋ "kpei
‑wɛe ‑a ‑e 'mʋa‑ nʋ 'de ‑a ‑e bla ‑a ‑e dee 'bo Kea "juɛi.
Dɩ "klein ‑ɩn ‑teea' Nyɔsoa i ɛ, ɛ "nyɩ ‑ʋn.
7 Kaan ka a 'ɩn juuɛ' 'beɔ Tʋ "bo ‑tea' 'o ɛ, ɛɛ ‑teɔ' kwa wɛi.
Ɛ nɩɛ 'o ɛɛ' ‑tein' 'de jaʋn 'di ‑wɛe ɛɛ kpʋn ɔɔ' baewlu‑.
Ɛɛ' "ikmaa' 'a muɛ nʋa' ɔ 'e tʋ 'a "jru kpa.
8 Nyʋ jrʋ' ‑teɛ' ʋʋa' ‑gblɛ ke ʋʋa' tʋ ‑fɔn' soe" ‑kwlɩ"
'kaa ‑apʋ mɔ ɛ, Nyɔsoa ‑ɛ ‑nɩa ‑aa Kea a ɛmɛ ‑a ‑te' ‑kwlɩ".
9 Ʋʋpʋ‑ mɔ ɛ, ʋʋ ‑srɛɛi ‑wɛe ʋʋ ‑kai', 'kaa ‑apʋ mɔ ɛ, ka ‑a ‑nyna ‑sisi 'ka ‑a ‑nyna.
10 Tʋ "bo, ‑ɩn ‑pʋʋ' ‑aa 'beɔ,
‑ɩn nʋɛ ‑wɛe ‑bo ‑a poɔ baewlu o ɛ,
ɔ 'je ‑aa wlu doun" o po.